 |
| ريتشارد لوفينج وعائلته |
عام 1492 م كريستوفر كولمبس رست سفينته على ارض امريكا بتمويل اسباني بعدها السباق بدأ بين اسبانيا و البرتغال .
بريطانيا الجزيرة الفقيرة حست بالغيرة وقررت تدخل السباق واقامت مستعمرات على مانسميه الآن الولايات المتحدة بس كان البحارة البريطانيين يروحوا لأمريكا يكتشفوا ان المستعمرة سكانها اختفوا ماحدش عارف السبب السكان الأصليين ولا الأوبئة لحد سنة1607 م واول مستعمرة دايمة جيمس تاون على اسم ملكهم بس كانت كلها رجالة مافيش ست رضيوا يبعتوها للمجهول وسنة 1619 م وصلت اول سفينة محملة بالنساء للزواج من رجال المستعمرة ضمانا للاستقرار ( كان النفي للمستعمرة خيار بديل عن تنفيذ احكام جنائية عليهن ) ووصلت كمان سفينة هولندية محملة بالعبيد الافارقة للعمل سخرة في الارض -مش حاتناول دلوقت ان الافارقة دول كانوا احرار في وطنهم اتخطفوا واتباعوا واتهانوا واتحشروا في سفينة كان بيعيش منهم العشر فقط في رحلة العذاب – المهم الأرض واسعة والتوسع شغال و الاسلحة والأوبئة القادمة من العالم القديم بتقتل السكان الأصليين و سفن العبيد بتزيد وعددهم بيزيد فكان صاحب الأرض بيجوزهم وبيعتبر الجارية منهم ملكه حتى لو كانت متزوجة ولو انجب من جاريته ولد اسود يبقى من عبيد الأرض ولو ابيض يبقى منبوذ ولو صاحب المزرعة قلبه حنين ياخده من امه وينسبه لزوجته حتى بعد الاستقلال عن بريطانيا سنة 1776 م الرئيس الثالث توماس جيفرسون كانت له علاقة بجاريته انجب منها ست ابناء وهيه بدورها كان أبوها رجل مرموق في المجتمع وأمها جارية .
لحد ماقامت الحرب الأهلية واتحرر العبيد بس فضلت الولايات الجنوبية الزراعية جواها التمييزالعنصري اصيل وان خفت حدته شويه في الولايات الشمالية الصناعية وفضلت العلاقة بين الرجل الأبيض و المرأة السوداء مشروعة طالما مفيش زواج هيه أدنى منه .
أما المرأة البيضاء لو تزوجت رجل أسود بتتشنق هيه وهوه و الأولاد , وسنة 1958 م بولاية فرجينيا ريتشارد لوفينج شاب امريكي قرر الزواج من فتاة سوداء اسمها ميلدريد كان صديق لعائلتها طبعا الشرطة مسكته وسجنته وعذبته علشات تعقله اعمل اللي انت عاوزه لكن زواج لأ , لحد مااصبح الزواج حقيقة وهربوا لواشنطن علشان اتحكم عليهم بسنة سجن واصبحوا محرومين من أهلهم و انجبوا أولادهم بعيد عن العائلتين وفضلت ميلدريد تناضل لحد مالقوانين اتغيرت وسمحوا للزواج المختلط بين البيض والسود سنة 1967 م في وقت كان فيه العالم دول اسيوية وافريقية وامريكا الجنوبية فقر وتخلف و اوروبا الغربية دولها الاستعمارية راحت عليها واتكشفت جرايمها والمانيا مقسومة نصين و الاتحاد السوفيتي والصين و اوروبا الشرقية قافلين على نفسهم بيعذبوا شعوبهم بالشيوعية و امريكا بس هيه جنة الحرية و الرخاء والتقدم في العالم لأ وكمان بتحضر علشان تغزو القمر , ماتستغربوش من اللي بيحصل في أمريكا دلوقت .
ليست هناك تعليقات:
إرسال تعليق